mercredi 4 novembre 2009

Medòc de Montpelhièr

Lo site del Med'òc de Montpelhièr es aicí :

Lo Med'òc dau clapàs

mercredi 16 septembre 2009

Una novèla annada comença

Setembre, lo temps dels cambiaments. La sason a l'ostalariá/bar es acabada, s'es plan capitada amb pas cap de problèmas màgers. Ai sonque agantat un tipe pel còl un ser quand èri darrièra lo comptador, es pas totjorn aisit d'èsser aimable a 4 oras del matin amb la lassièra e saique l'alcòl qu'ajudan pas. Pr'aquò èra un bon estiu a Milhau, ai fòrça trabalhat, de jorns 20 oras, 10 oras al primièr trabalh de 8 oras del matin a 6 oras del ser amb qualques minutas per dinnar. Puèi tre 6 oras lo segond trabalh fins a 5 oras del matin.

Soi pas jamai estat mai urós que dins la docha entre los dos trabalhs, entre 6 e 7 oras. Mas èra pas tot lo temps aquò, fasiái sonque 20 oras a mon primièr trabalh e 40 o quicòm coma aquò al segond.

Vau començar una novèla annada, direccion San Francisco, mas per començar vau a Montpelhièr pendent un mes, ai pas mai mon apartament e vau lotjar en çò de Simon e Maria. En fach, vau començar una primièra annada de licéncia d'occitan per ne saber un pauc mai sus la lenga que parli, per ne conéisser l'istòria en detalhs. Es ja plan començat, ai sonque agut una convèrsa al telefòn amb una professor, Maria-Joana Vermi, que m'a prepausada de me lotjar en çò ela alara qu'aviái res demandat! Vau donc anar a l'universitat pendent un mes o quicòm coma aquò, puèi seguirai la rèsta a distància per internet.

Anarai a San Francisco a la fin d'octobre, ai ja la bilheta dempuèi París cap a Londres, puèi de Londres San Francisco, tot aquò per 530€ per anar e tornar. Seguirai ma darrièra annada, sai pas se òm pòt parlar d'annada alara que s'acaba a la fin de març, mas se seguirà per un estagi de 6 meses per èsser vertadièrament acabada, sai pas encara ont vau far aqueste estagi, cal causir la vila ont vau viure almens doas o tres annadas, alara cal plan causir, benlèu San Fransisco, de perqué pas ?

mardi 21 avril 2009

OpenOffice en occitan

Sèm a 99% de la traduccion del logicial OpenOffice en occitan. Donc benlèu serà disponible dins una setmana o doas. Senon ai acabat, mas fa ja un brieu, Gran Torino en occitan.

Ara, espèri qu'aurem lèu lo drech d'aver lo site http://oc.openoffice.org, n'ai fach la demanda e espèri la responsa.

jeudi 8 janvier 2009

Soi pas mòrt

Soi pas mòrt, mas soi pas fòrça ben. Ai de mal per respirar dempuèi una setmana, ai besonh de dormir un fum d'oras cada setmanas e coma s'èra pas aital, diluns ser, o puslèu dimars matin me soi fach una luxacion d'espatla dins una carrièra de Montpelhièr. E ai tanben mal al cap e mal a totes los muscles.

Sèm dijòus e ai encara mal, cada segonda mon espatla e ma gòrja me fan mal. Pr'aquò es pas tot, es pas possible de caufar mon apartament, fa pas mai de 16 amb lo calfatge al maximum. E amb mon nèrvi qu'es cunhat lo freg es mai dur de suportar.

Lo magazin a començat a me publicar, escrivi cada mes çò que vòli, pel numèro de febrièr, vau escriure quicòm a prepaus de l'occitan sul web, wikipèdia, lo forom occitània, opensubtitles.org/oc/, lo bloguitge ! Mas lo problèma es que devi escriure a prepaus de l'actualitat tanben, mas devi acabar lo tèxt abans lo 15 per èsser publicar lo 5 del mes d'aprèp. Donc cal un pauc imagenar lo futur !

Si que non soi a 80% de la traduccion del film american, "The godfather" en occitan, ensagi de far lo mens de fautas e aquò's long ! Es acabat per la fin de la setmana se tot va ben, se soi pas mòrt.

Vaquí, sèm lo ser es 11 oras passada de 37 minutas, ai pas pus mal al nèrvi, a l'espatla. Ai begut doas botelhas de Bordèu, doas botelhas a dos èuros caduna. Uèi tot va plan, soi sul niu mieu.

samedi 27 décembre 2008

Qualques jorns en Alsàcia

Èri partit qualques jorns en Alsàcia amb los meus, la maire, lo paira e la sòrre. Coma cada annada partissi amb eles per lors faire plaser. Puèi es subretot qu'an los dos que 15 jorns de vacanças cada annada donc anem a l'estrangièr en estiu per 10/15 jorns e pendent 1 a 5 jorns en França en ivèrn, cada còp a Nadal.

Ma maire es dins qualques setmana al caumatge, pel moment trabalha dins l'espeçariá a sa maire a Milhau, mas dempuèi qualques annadas l'espeçariá es aquí unicament per la nòstra noiridura e lo salari de ma maire, alara vendèm a la comuna. Se tot es plan aquò fa per la menina 100.000 èuros, aquò's una polida soma ! Mas sabi pas çò que va far ma maire, a trabalhada tota sa vida a l'espeçariá e a solament 45 ans, donc deu trobar un autre mestièr e aquò's pas aisit.

Sèm donc anats en Alsàcia pels marcats de Nadal, es luènh aquel país, 8 oras de veitura, mas èra un bon viatge, al calme. Avèm caminats dins Estraborg, dins los marcats, ai jamai aital manjat e begut de ma vida, en 4 jorns, ai manjat mai que dins setmana normala.

Sèm tanben anats en Soïssa e en Alemanha (2 oras per dire qu'avèm vist un país !), per Nadal avèm dormit dins un tres estalas una ostalariá polida a 70€ la cambra alara qu'es a 130€ los autres jorns per dos amb lo dejunar. Aquesta ostalariá fasiá tanben casinò.