Diluns d'auton

Dins la carrièra, un fum de fuèlhas sus los trepadors, pas aital sus los arbres. Soi totjorn a Milhau, fins a nadal ai escòla solament de dimècres a divendres, sai pas çò que vau a faire lo diluns e lo dimars, benlèu trabalhar a l'ostalariá del paire. Fa un solelh grand mas tanben un vent grand.

Amb Thomas sèm anats faire un pichon torn a pè, de Milhau a Massabiau pels camins e de Massabiau a Milhau per d'autres camins. Pichona balada dins lo milhavés a discutir de tot e de res. Pas besonh de mai per èsser urós, aquel païsatge, aquela odor, se soi amorós es d'una unica causa es d'aquel luòc. Puèi après nos sèm dits adieu e a nadal per se veire 2 jorns, puèi a l'estiu pas abans. Es pas aisit d'aver los amics a l'autre costat de la tèrra, per Thomas es solament Roan, mas qu'es luènh !

E a 7 oras, agachi lo mieu corrièr electronic, e que vesi, un de mon escòla per me dire que deman a 9 oras e mièg, devi èsser a l'escòla per un seminari d'acuèlh ! Ò puta que fa pas plaser ! Donc ara soi a Montpelhièr a beure qualques pastisses e una botelha de Galhac.